جريدة نبض القلم الأدبية
مقالات مشابهة
الساعة كام بالظبط ؟
مش فارقة !!
العمر جايز يتخطف سرقة
كل ما تقرب م الوجع – تقع
وكإنه ناصب لىّ ألف كمين
آخر قصايد كتبتها تأبين
مبقيتش آمِّن للبشر عامةً
مهما يزيدوا بشوفهم قلة
مبقيتش ألاقي ف البشر أدوية
دوقهم تلاقي كلهم علة
ضوء النهار علي بعد كام ميل
وأم كلثوم بتغني القلب يعشق كل جميل
و أنا قلبي بات دبلان منتهي الصلاحية
دور الضحية و الألم و الشعر
مبقاش يأكل عيش
و الحزن أشبه من رصاص الحرب
او طيارات الجيش
و إللى صبر انخدع
بعد اما عمل البدع
و يقوّى نفسه الجدع
و يقول بكرة ننول
معرفش ان الكون
يشبه خناقة لعرب ع أرض بير بترول
ف الحقيقة كان نفسي أكتب لكم
نكتة تضّحكم ف زمن كئيب كالح
إفيه لسعيد صالح
أو أهنى روحكم بالانتصار و الفوز
بس أنا مش أراجوز
انا أقنعت روحي إن أنا شاعر
الشعر نَصِى و نُصى التاني
صاحبي إللى عمره ف مره ما نساني
ك العادة يعني ضرير
روحي أصابها عَمى
بشكي بئسي وحزني للسما
هي النور الوحيد
ف بلادكم المعتمة
ملتزم الصمت أنا من فترة
الخوف بقى عادة و بقا فطرة
كوكبكم سخيف و مخيف للغاية
كان لازم للقصة نهاية
و الساعة ثابته ف مكانها
الأرض بتلعن سكانها
مبقتش بحس بطعم الوقت
ووصلت لدرجة تخليني
معرفش أنا لية صاحي لدلوقت ؟
بالله عليك لتوّعينى
فهّمنى يا معالي البيه
بيقولوا إكرام الميت دفنه
طب قول لى صحيح
انا عايش ليه..؟
#محمد_الحلواني
