الرئيسية / شعر وخواطر / شعر / قصيدة احتضار

قصيدة احتضار

 


لو لِسَّه فيك الروح ،عندك أمل هتعيش
فضلا متسمعنيش..!
من بعد 12 نص الليل ..بتفنّط زى الكوتشينة
فى ايدين سكران مسجون واقف خلف القضبان
بيشوف الناس كلها مساجين..!
ولوحده !طليق هربان بيدّور مش لاقى طريق ..
مسطول بيموت ويفوق تانى …!
والمقتول بقى اسمه الجانى .
بدرّوش ولوحدى بعانى !وبعيش اليوم يشبه لسنين ،
أعلنها بصدق و دون إحراج ..أنا بكره صنف البنى آدمين ..!
أنا مين ؟ساكت،رخيص ،بائس !
بواقى علبة سجاير فرط !
مشهد يومى متكرر
مج شاى زياده تقيل ، زيادة سُكره مَرر.
مبنميزش بين حلو ومالح ،هدوء كالح!
روتين متعاد ..بهرب مالخناق ببُعاد..بهرب مالكلام بسُكات !
وجيبى اللى فِضى فجأه! مسابش كام جنيه فَكه ، وكارت شحن من فورى !
وبين ضلعى حاضن جورنالى كالعادة،فى أول صفحه فى المانشيت !الزمالك تالت الدورى !
ف بيأس يأس فوق يأسى وبدمع ضحك من بؤسى ..بَدين حظى ..!
تيجى الدولة تدفعنى تمن أرضى !تطفحنى رغيف العيش ..
صارحني وقول معيش !
يا أغنى فُقرا فى العالم ..يا أغبى شعب نفسه يعيش !!
وإيه فاضل ؟سوى أنفاس وفاضل ع الدمار جوله ..
عادى جدا ! كل شىء فى بلادنا وارد ..كل عقل فى همه شارد !
وأنت لِسَّه بتنزف شِعْر وبتبكى كلام موزون !
يوجع جارح أو مجروح !
قولى ازاى ؟عاوز تنسى ولازلت بتعيش فى امبارح..!
وعارف انها مش جايه !
الروح لو رجعت لخالقها ..بردو الأحضان تفضل حيّة .
أوضتك تشبه منامة فى مقابر الأموات
وصوت الست بتغنى فات المعاد…فات المعاد
وأنت اللى مستنى ..تفيد بإيه يا ندم وتعمل ايه يا عتاب ؟!
فرق الوجود مالعدم ملوش قانون فى الحساب ..!
لِسَّه اللُقى صدفه..لِسَّه الفراق أسباب!
الناس كلها من صنف قابيل ؛مقتول ي قتيل ،
مسجون ي سجين .
وأنا لِسَّه ما بينهم بستغرب أنا مين ؟..أنا مين؟!
كل اللى عاش شاعر كانت الحروف أهله ..والموت بينده له .!
ولذلك فى الدنيا أنا زاهد …أنا مُت من ضعفى ..
ملحقتش اتشاهد ..!

 


محمد_الحلوانى

عن fatima saleh

شاهد أيضاً

الشاعر.. حسام إبراهيم في معرض الكتاب

في مفيش ساعتين كان الاتنين حفروا الأنفاق وبكلّ غباء ماكانوش عارفين هتودّي لفين. ماحناش خايفين؟ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *