الرئيسية / شعر وخواطر / هُزي إلى قلبك

هُزي إلى قلبك

 

بنتشابه فـ أوجاعنا
و حكاوينا
يجوز في فرق في ظروفنا
لكنه بسيط
حياتنا تشبه السيما
يومين نفرح
يومين نبكي
و يعجب فلمنا الجمهور
دا مبسوط
و دا مكسور
و دا نفسه يكون في الدور
و دي بتبكي على نصيبها
و دا حالف ما هيسيبها
و انا و انتي
بنتفرج من الشاشة علينا احنا
و ع الدنيا ، و أمانينا
و كل اللي حوالينا
بيخلقوا فـ أمل زايف
و عند الجد يسيبونا

أنا صابر كما أيوب
و عارف اني كلي عيوب
شيطان شابك
في توب طهرك
و نفسي بس اشيل حملك
و اجفف شلالات دمعك
و أكونلك خيط
يحيك جرحك فتتخفى ندوب روحك
و أكون الأمن في سكوتك
أو الصرخة في حين نوحك
لحاف أمل يدفيكي فـ شتاء حزنك
و قلب عمره ما يخونك
أنا الدرويش في محرابك
و حلمي سجدة للمولى
و تسبيحة على ايديكي
و آية اقرأها فـ عنيكي
فتنطق قسوة الدنيا
يارب آمين

” فصبرٌ جميل “
ها نحنُ ذا متشابهان
متقاربان
كـ عذبٌ فراتٌ و مِلحٌ أُجاج
إن فرقونا
و باعدونا
سأعودُ حتمًا للقاء
كل الذين عاهدوكِ ، فارقوا
أما أنا … مصلوب على شباك لُقا
لنَ أرحلا و لو بعد الحين
فـ هُزي لصمتكِ و انتِ تتأكدي
إن اللي حبك ،
كل لحظة شوقه إليكِ يزيد
مهما يطول الصمت أو كَثُرَ البُكا
قلبه في عشقك زي بصره يوم القيامة … حديد
و اسمعي الصوت المنادي من جوفك
” ألا تحزني “
شاوري لقومك ع الفؤاد
لو يفهموا لغة العيون
راح يفقهوا محنتك
ولا تيأسي
اضحكي
و اتدلعي
يمكن حوت الأيام يبتسم
فينبذك برة الظروف
أنا لا أملك ما يكفي من الحروف و التشبيهات
كي أوصفك
هزي إلى قلبكِ و انتي تتأكدي
انك كما مريم
و اني كـ زكريا
نفسي أكفلك

 

هُزي إلى قلبك
بقلم … أحمد سالم

عن fatima saleh

شاهد أيضاً

الشاعر محمد المصري يكتب.. مَنتاش يوسف

بتقول انك فتشت جيوبك كده حيلتك ايه وطلعت بكام حبة أوجاع بالإسم أيام وجوزين جنيهات …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *