الرئيسية / شعر وخواطر / سِكّة_سَفَر

سِكّة_سَفَر

 

{{ الصّورة اللي شايفها بتِعْكِس أحجام مش نَفس الحقيقية }}
وطريقَك ماشي بتفاصيلُه من جهة السّوّاق ” يوميّة ” …
متعوّد يكسر مود السّكَّة بْكام ” إفّيه” أو أغنيّة …
متعوّد تكسر كود عُمرَك علشان الهجر اصبح غِيّة !!

*************
بريء فِ قصيدة مُتَّهَمَة
حزين فِ الفرح ليه مِتساب ؟؟
صُغَيَّر ، دنيتُه عجوزة
ومش لاقي لْحياته اسباب …

بقالنا كتير …
بنوصف ترتيبات العمر والذكرى وكام فكرة وقولِة : ” آه ” …
وننزف شِعرنا جَهرًا ونتجمِّل إذا قُلناه
وياخد حقّنا هذا ، وذاكْ يسلاه
ونظلم نفسنا بالقُربِ ، ييجي القرب يظلمنا !
وتبكي علينا أيامنا

ومانمِلِّش
رصيد الصبر مش بيزيد
لكنُّه برضو … ما يْقِلِّش …

بقالنا كتير…
وما بقى لْنا
فِ خزنِة قلْبِنا تبرير …

بقيت بَكْرَهْ أشوف النور ، عشان مش عاوز اتفاجئ بإني لوحدي مش مسنود …
وإنّ اللمّة والصّحبة ، ما كُنتش فيها يوم موجود
طبيعي ؛ لو مفيش اعداد ، مالوش لازمة وجود معدود !
شِبِعنا وعود ✋

فباللهِ ، إذا قرّرت يوم البُعد ، خُد باقيك
عشان مش عَدل إنّك تبقى مستقبل لناس مابْقوش سوى ماضيك
ولو سافِرت من ذِكراهم النّاسية ، خلاص خلّيك.

ولو _فَرضًا _ عَزَفْت اللحن لحظِة صِدق ،كُن راجِلْ
بلاش تبقى كما النّشرة فْ (( نبأ عاجِلْ ))
لَ منها وَفّت التفاصيل
ولا كَفّت فضولْ بَشَري ،وسابتهم بلا تعليل .

بلاش تَضليل

لأن السّكّة مكتوبة عشان توصَل
لأنك لو غريب عنها ، لابد تصاحب التّوهة وتأْلَفها
هتِجهل فِ الطريق علامات
وبرضو حاجات هتعرفها
هتتعلّم إذا اتألِّمْت فِ مْطبّات
وكام حادثِة مرور هتمُرّ فِ المسافات

وكَفّ هتحتضن كَفَّك
وكَفّ مش اللي في صفَّك
وكَفّ تكِفّ ؛ فَتعِفَّك
وكَفّ تعيشلها ، تلفَّك
وحين مسِّت ميزانك ، خان
وقام خفَّك
وكلّ اللي سَتَرته بْتوبَك اتدفَّى ؛ فَراح شفَّك

✋ أخيرًا … أو لأنّي وصلْت للنّهايات
هَحاسب عَ الطريق وَحدي… تَمن مافات

* وفاءً :
للي حبّتها وقالت إنها أختي ؛ فباعتني

* مُرورًا :
باللي حبّيته فكان في ضهرها نصرًا ، وباعني لمّا حاربِتْني

* وصولًا :
للي كان أمَلي ؛ كَأبّ وأخّ حسّيتُه ؛ فَزَوّر في مشاعري وقال : كانت كدّابة حبِّتني

* وجهلًا :
باللي كانت روحي فَنْسِتْني

* وزُهدًا :
فِ اللي حبّاها ، وهيَّ _لطيبتي _ مَلِّتني

* وُقوفًا :
بالقريب جدًّا …
وبينَّا الأرض والسّماوات !
وعارف كلّ حكاياتي ،برغْمِ سْكات

حسابَك كام؟؟وَرق ونفوس؟؟
وخَلْق فلوس !!

أخوك اللي اعتبَرتُه حصيلة الأيام …؟
آديه هاجِر …

وذاكَ اللي حسبْتُه ملاك
طِلع فاجِر
وبيتاجر

يبيع روحَك
مقابل فرصة لجروحك

حسابك كام؟!
سوى الأحلام

وذكرى نسِتها فِ الأيّام
وسكّة كلّها أوهام!
ودَعوة بتبتهلها دموعك الصاحية فِ حين مَ تنام …

“”” يارب ف دنيتي وَحدي
فَكُن لي مُؤنسي لمّا
تفارق روحي هذا القلب بين لَحدي “”” …

سِكّة_سَفَر
بقلم رانيا سنوسي

عن fatima saleh

شاهد أيضاً

ولاء أحمد تكتب .. طيف”

وأَمْشِي.. بِبَعْضِ الفؤادِ وَكلِّ الحكَايا هُما كلُّ حظِّ انتِفَاءٍ طويلْ وسرُ السؤالِ الكبيرِ الكبيرْ عَلَامَ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *