أصلي

 

صعيدي اصلي من قبلي
وجاي اكتب كلام طاب لي
محدش قاله من قبل لي
ارص الكلمة واحبكها
واشبك فيها علي مهلي

جيت اشبكها فشبكتني
جيت ارسمها على ورقة
على ايامي صلبتني
بقيت والكلمة
زي اتنين
سوا ماشين
هدفهم في الطريق واحد
لكن مع بعض مختلفين

ومهما نعادي بعضينا
وتبعد بينا خطاوينا
نعود نرجع لبعضينا
يجمع بينا لحن حزين

يجمعني أنا وهي
نحيب الناي واناته
يوماتي نجدل الموال
باوجاعه واهاته
والقاني بدور فيا على كلمة
ولسة كلامي ع الكلمة
و اتوه ف المعني واللزمة
واغيب وانسي انا الحاصل
ف رص كلام مالوش لازمة

واكره توهتي ف كلامي
واكره نفسي وايامي
وادور تاني على كلمة
تفسر حيرتي وفصامي
مريض نفسي انا يمكن
ويمكن حالي مش ممكن
لكن مش عاوز اتمسكن
واقول اني .. صايبني جنان
يبرر كل احوالي
صعيدي اصلي من قبلي
وواعي لقولي وافعالي

 

بقلم جمال محمد جامع

عن fatima saleh

شاهد أيضاً

الشاعر محمد المصري يكتب.. مَنتاش يوسف

بتقول انك فتشت جيوبك كده حيلتك ايه وطلعت بكام حبة أوجاع بالإسم أيام وجوزين جنيهات …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *