الرئيسية / روايات / فقره مشاهدنا – كلاكيت

فقره مشاهدنا – كلاكيت

بقلم / جهاد مجدي

*كلاكيت اول مرة:

ايه يا حبيبتي مش ناوية تفرحينا بيكي؟

هو انتوا مش فرحانين بيا ده انا جبت مجموع كبير وهدخل كلية كويسة

*كلاكيت ثاني مرة:

ايه يا حبيبتي يعني بقالك 3 سنين في الجامعة مفيش حاجة كدة ولا كدة عاوزين نفرح بيكي = والله انا فرحانة بنفسي وبعدين الحاجات دي نصيب ولسه النصيب مجاش

*كلاكيت ثالث مرة:

– يعني يا بنتي خلصتي دراسة واشتغلتي اهو مفيش حاجة؟ دي بنت عمتك خلصت سنة اولي جامعة واتجوزت. = نصيب وأنا راضية بنصيبي

*كلاكيت رابع مرة:

– اسكتي مش فلانة اتجوزت من شهر وحامل وفلانة دلوقتي ماشاء الله معاها 3 عيال … عقبالك يا حبيبتي لما نفرح بيكي. = ربنا يبارك لهم انا الحمد لله راضية ومستنية نصيبي ومتأكدة ان ربنا شايل لي حاجة كبيرة اوي عنده وصحيح انا فرحانة بنفسي أوي.. انا جبت مجموع كبير في الثانوية ودخلت كلية كويسة تفوقت في دراستي وكل اساتذتي بيحترموني اما بقي بنت عمتي اللي اتجوزت بعد سنة اولى جوزها قعدها من التعليم. دلوقتي بشتغل و معايا ماجيستير و بحضر دكتوراه ، اما فلانة اللي اتجوزت من كام شهر و حامل ربنا يقومها بالسلامة اللي متعرفيهوش ان جوزها ده بيصبحها بعلقة و يمسيها بعلقة ، اما بقي فلانة اللي معاها 3 عيال ربنا يحفظهم لها فدي بتطفح المر عشان تصرف عليهم عشان جوزها صارف كل فلوسه عالستات ، متتخدعيش بالمظاهر اللي هما عاوزين يبينوا بيها انهم ناجحين في حياتهم هما بيعملوا كدة عشان يداروا علي غلطتهم انهم مختاروش من الاول الشخص المناسب و ان اول واحد خبط علي بابهم وافقوا عليه، و انا برضوا واثقة في ربنا و عارفة انه شايل لي نصيبي و محدش غيري هياخده .

*كلاكيت اخر مرة: = مش هتباركي لي بقي؟

– هه؟ مبروووك

1- فرحتكم ببناتكم مش متلخصة في دبلة في ايديهم ولا راجل قاعدة جنبه في الكوشه، افرحوا ببناتكم بتدينهم، افرحوا ببناتكم بعلمهم وتفوقهم، افرحوا ببناتكم بعفتهم.

2- ارجوكم خليكم في حالكم محدش يسأل بنت (ها ناوية تفرحينا بيكي امتي؟ مفيش حاجة كدة ولا كدة؟ مش هنفرح بيكي بقي؟) كل دي اسئلة بتخليها تحس ان فاتها قطر الجواز وبتخليها توافق على اول واحد يتقدم لها من غير تفكير عشان فلانة اتخطبت وفلانة اتجوزت وفلانة حامل.

3- ارجوكم تاني بلاش سؤال عاوزة الشهادة الاول ولا العريس؟ عشان محدش عارف النصيب فين… طيب افرضوا قالت الشهادة بس نصيبها الكويس جالها وهي بتدرس كلكم هتقولوا لها انتي مش قلتي عاوزة الشهادة الاول؟!

اخر كلمة ==> خليكم في حالكم

عن admin

شاهد أيضاً

#ورا_كل_شباك_حكاية ( الحكاية التانية )

  ياريت و أنت نازل تاخد كيس الزبالة معاك ، و إنتي متتأخريش الساعة ٨ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *