طفولتي

طفولتي

بقلم/ هاني احمد علي

 

 

ياما نفسي أحيا الطفوله اللي فيا

و أرجع و أعيش بدون مسئولية

و ترجع عوايدي و روح عند والدي

و أطلب في لعبه جديده و هدية

و أضحك و أكركر و أغني و أصفّر

تداعب خيالي الحكاوي الشقيه

و ألعب بكُورتي و أبيِّن في صورتي

هداوتي و حلاوتي و شقاوتي الغبية

صُحابي ينادوني و أصاحب جنوني

و نجري و نلعب لعبنا اللي هي

و أتابع بقلبي حكاية مراكبي

و أعبر  بحوره الغويطه العفيه

و افرض كأني باساعده و اني

بأعافر في موجه شديده و قويه

و نوصل لبر الأمان لما نتعب

نريّح و ننوي المغامره اللي جايه

و أعيش الجراءه في صورة براءه

و احارب وحوشي الغريبه الخفيه

و اركب عجلتي الجديده اللي جتلي

يشوفها صحابي و يجروا عليا

و انظم في وقتي بطريقتي و راحتي

واعيش بره سني الحقيقي شويه